Samgönguráðuneytið hefur ekki kynnt fyrirhugaðar breytingar fyrir viðskiptavinum sínum hagsmunaaðilum íslensks atvinnulífs eða leitað álits þeirra. Samgönguráðherra hefur heimsótt stofnanirnar sjálfar þar sem málið hefur verið kynnt fyrir starfsmönnum. Það vekur athygli að enga frétt um málið er enn að finna á vef ráðuneytisins eða stjórnarráðsins. Er ekki ástæða til að upplýsa um það ef ákvörðun hefur þegar verið tekin um sameiningu stofnana?

Stýrihópurinn sem á að sjá um verkefnið er skipaður 13 fulltrúum, embættismönnum.  Flutningasvið SVÞ og aðildarfyrirtæki þess eiga flest sín hagsmunamál undir samgönguráðuneyti og stofnunum þess. Þar er að finna mikla þekkingu á stjórnsýslunni í þessum málaflokki sem augljóslega ætti að vera eftirsóknarverðar upplýsingar vegna þeirra breytinga sem fyrirhugaðar eru. Er ástæða til að ítreka hvatningu til samgönguráðuneytisins um að nýta sér þá þekkingu.

Sameiginlegir hagsmunir flutningagreinarinnar og almennings í landinu eru að endirskipulagning stofnana í þessum málaflokki takist vel. Að hún skapi hagræðingu og að hún leiði til bættrar stjórnsýslu þar sem byggt er á þekkingu.

Það er ástæða til að benda samgönguráðuneytinu á að til eru margar skýrslur Ríkisendurskoðunar þar sem sameiningar stofnana hafa ekki leitt til hagræðingar eða bóta heldur þvert á móti. Af því er mikilvægt að læra og full ástæða til að biðla til samgönguráðherra að hafa skýr markmið að leiðarljósi við fyrirhugaða endurskipulagningu og vita fyrirfram til hvers hún á að leiða.