SVÞ - Samtök verslunar og þjónustu | Ekki flækja skattkerfið

Þú ert hérna: Forsíða

Ekki flækja skattkerfið

Af þeim mörgu skattkerfisbreytingum sem nú standa fyrir dyrum eru áform um nýtt skattþrep í virðisaukasatti sínu verst fyrir verslunina í landinu. Samtök verlsunar og þjónustu leggjast eindregið gegn þessum breytingum enda eru þær bæði til þess fallnar að flækja skattkerfið og að mismuna einstökum tegundum matvæla í skattkerfinu.

Svo sem kunnugt er gerir frumvarp stjórnvalda til laga um ráðstafanir í ríkisfjármálum, ma. ráð fyrir að 14% virðisaukaskattur verði lagður á matvörur á borð við kex, súkkulaði og drykkjarvörur. Þá verði þjónusta veitingahúsanna með 14% virðisaukaskatti.

Samtökin eru þeirrar skoðunar að öll matvæli eigi að vera í sama þrepi í virðisaukaskatti. Því sé mun skynsamlegra í stöðunni að hækka allt neðra vsk þrepið úr 7% í 10%. Með því móti mun ríkissjóður fá sömu tekjur og með þeim breytingum sem gerð er tillaga um. Jafnframt mun þetta þýða að flækjustigið í skattkerfinu verður minna en ella. Þá hefði þessi leið þann ótvíræða kost í för með sér að öll matvæli eru lögð að jöfnu í skattkerfinu og neytendum því látið eftir að ákveða innkaup sín án atbeina stjórnvalda.

Kostnaður við breytingar
Nýtt 14% vsk þrep mun hafa í för með sér mikinn óþarfa kostnað við breytingu á tölvukerfum og sölukössum verslana. Kostnaður við þessar breytingar, eins og annar kostnaður mun óhjákvæmilega fara út í verðlagið og á endanum lenda á neytendum. Þá leiðir af sjálfu sér að nýtt vsk þrep mun flækja skattkerfið og gera skatteftirlit flóknara og dýrara.

Fréttapóstur SVÞ

Þjónusta

Saga verslunar á Íslandi