Vel sóttir kynningarfundir um námsbraut í flutningafræðum

Um það bil 70 manns hafa nú sótt kynningarfundi um nýja námsbraut í flutningafræðum í Opna háskólanum í HR. Fundir hafa verið haldnir í Eimskip, Samskip og hjá flutningasviði SVÞ. Greina má mikinn áhuga á meðal flutningagreinarinnar á þessari nýju námsbraut og er það öllum sem að málinu hafa komið mikið gleðiefni. Flutningar eru stórt mál í rekstri hvaða fyrirtækis sem er. Innkaup, birgðahald og vöruflæði getur skipt sköpum um afkomu hvaða fyrirtækis sem er, hvort sem um er að ræða framleiðslu, heildverslun eða smásöluverslun. Það er brýnt mál fyrir þessar atvinnugreinar að nú sé til námsbraut sem beinlínis einblínir á flutningakeðjuna alla og vekur athygli á þessum mikilvæga þætti í rekstri fyrirtækja.