SVÞ telur gengi krónunnar undirrót vandans

Þegar forsendur fyrir vaxtaákvörðun Seðlabankans voru kynntar á dögunum, var tekið fram að ekki hefði verið hægt að stíga stærri skref nú þar sem gengi krónunnar væri enn of lágt. Verðbólga hefði minnkað minna en vonir hefðu staðið til, sem svo skýrðist af lágu gengi krónunnar. Þess vegna hefði peningastefnunefnd bankans ekki treyst sér til að lækka vexti meira en raun ber vitni. Þessar útskýringar bankans sýna vel hvert vandamálið er sem við er að glíma. Gengi krónunnar er undirrót þess vanda sem við er að etja í peningamálum. Verðbólgan hefur ekki minnkað eins hratt og vænst var vegna þess að gengið er áfram lágt. Þessi tiltölulega stutta skýring bankans sýnir enn og sannar að forsendan fyrir því að unnt sé að hefja uppbyggingu atvinnulífsins með markvissum hætti er að gengi krónunnar styrkist. Þá muni verðbólgan minnka hratt og vextir í kjölfarið. Það mun síðan leiða til þess að fjárfestar verða fúsari til að fjárfesta í arðvænlegum atvinnufyrirtækjum, en hið háa vaxtastig hefur haft mjög letjandi áhrif á áhuga til fjárfestinga. Menn hafa velt því mjög fyrir sér hvað valdi því að gengi krónunnar styrkist ekki. Að mati SVÞ snýst þetta að stærstum hluta um trúnað og traust. Allir eru sammála um að gjaldeyrishöft séu slæmur kostur. Óhætt er þó að fullyrða að gjaldeyrishöft sem ekki halda séu enn verri kostur. Á meðan gjaldeyrishöft eru í gangi er nauðsynlegt að virkt eftirlit sé með því að þau haldi, annað viðheldur vantrausti á krónunni og heldur henni áfram veikri. Vari slíkt ástand lengi mun það hafa varanleg áhrif á landið sem fjárfestingarkost, bæði frá erlendum aðilum og ekki síður innlendum fjármagnseigendum. Allir hljóta því að gera sér grein fyrir hvað í húfi er. Allt ber því að sama brunni. Veik staða krónunnar er undirrót vandans. Styrking hennar er forsendan fyrir því að íslensk efnahagslíf öðlist það traust sem það þarf nauðsynlega á að halda. Tryggja verður með öllum tiltækum ráðum að svo verði.