Á fundi framkvæmdastjóra aðildarfélaga SA með forstöðumönnum fyrirtækjasviða ríkisbankanna þriggja sem haldinn var 11. maí sl., kom fram eindreginn vilji til nánara samstarfs af beggja hálfu.  Þar var ákveðið að taka upp nánara samstarf milli aðila, bæði í þeim tilgangi að draga úr tortryggni milli banka og atvinnulífs og einnig til að vinna að sameiginlegum tillögum um endurreisn fjármálakerfisins og atvinnulífsins alls.

 Á fundinum kom fram að líklega mun gjaldþrotum fjölga mikið á næstunni, en því hefur verið spáð að á milli 30 - 40% allra fyrirtækja í landinu muni ekki lifa af það efnahagsástand sem nú ríkir.  Staðfestu forstöðumenn fyrirtækjasviðanna að það væri í raun umfang vandans eins og hann blasir við þeim.
Aukið samstarf milli bankanna og atvinnulífsins er því gríðarlega mikilvægt og er ástæða til að fagna  að stefnt skuli að auknu samstarfi og eru allir þeir sem áhuga hafa á að taka þátt í samstarfi við bankanna beðnir um að hafa samband við skrifstofu SVÞ sem fyrst.