Lokaverkefni í verslunarfagnáminu

Eins og Fréttapósturinn greindi frá nýlega voru brautskráðir nú í vor 16 verslunarfagmenn frá Verslunarskóla Íslands. Nemarnir gerðu lokaverkefni sem öll tengdust vinnustaðnum þeirra á einn eða annan hátt. Verkefnin voru mjög ólík, en sýna öll frumkvæði, faglega nálgun á starfið og tengsl milli skóla, vinnustaðar og starfs. Einn af þeim sem hlaut viðurkenningu var Stefán G. Aðalsteinsson starfsmaður hjá Byko fyrir verkefnið „Brettarekki“. Hann hannaði útstillingarbúnað fyrir vöru, brettarekka sem er einfaldur að gerð, ódýr í framleiðslu og einfaldur í uppsetningu. Rekkinn er einnig hannaður með tilliti til þess að skyggja ekki á brettavöruna heldur falla vel að brettinu og síðast en ekki síst að lítið fari fyrir honum þegar hann er ekki í notkun. Rekkinn er samansettur af tveimur fótum vinstri og hægri sem ganga inn undir brettið og skorðast þar, tveimur súlum er ganga niður í fæturna, gataspjaldi þar sem hengdir eru á prjónar fyrir vörur eða hillu fyrir vörur sem ekki er hægt að hengja upp. Brettið hefur verið notað í verkfæradeild Byko í Breiddinni þar sem Stefán starfar og hefur reynst mjög vel. SVÞ óska Stefáni til hamingju með áfangann og vel unnið lokaverkefni.