Tollkvótamál – Umboðsmaður Alþingis biður ráðherra um rökstuðning

Samtök verslunar og þjónustu – SVÞ hafa til margra ára barist fyrir auknu frelsi í viðskiptum með landbúnaðarvörur. Samkeppni milli innlendrar og erlendrar framleiðslu leiðir til aukins vöruframboðs og jafnframt lægra verðs og er því gríðarlegt hagsmunamál fyrir íslenska neytendur. SVÞ gerðu alvarlega athugasemd við nýtt tollafyrirkomulag sjávarútvegs- og landbúnaðarráðherra sem tók gildi árið 2009 og sem ráðherra hefur nú ákveðið að fylgja áfram. Með hinu nýja fyrirkomulagi var lagður tollur á tollverð vara í stað magntolla. Ákvörðun þessi var fráleit þar sem  innflutningsverð landbúnaðarvara hefur nánast tvöfaldast frá árinu 2008. Með umræddri ákvörðun var komið í veg fyrir innflutning landbúnaðarvara og samkeppni því úr sögunni.  Um er að ræða þrjár auglýsingar sjávarútvegs- og landbúnaðarráðherra vegna innflutnings á eftirtöldum vörum: •    nautgripa-, svína- og alifuglakjöti •    smjöri og ostum •    unnum kjötvörum Málsmeðferð ráðherra sem og eðli hins nýja tollafyrirkomulags er með öllu óásættanlegt og jafnframt ólögmætt að mati samtakanna. SVÞ lögðu því fram formlega kvörtun til Umboðsmanns Alþingis í júní síðastliðnum vegna ofangreindrar ákvörðunar. Umboðsmaður Alþingis hefur nú ritað sjávarútvegs- og landbúnaðarráðherra bréf og beðið ráðherra um rökstuðning fyrir ákvörðun sinni. Ráðherra hefur frest til 4. október til að svara erindi Umboðsmanns.