Leiðrétt fyrir árstíðabundnum þáttum nam samdráttur í veltu áfengis í júlí 3,8% frá sama mánuði í fyrra.  Verð á áfengi var 6,3% hærra í júlí síðastliðnum en í sama mánuði í fyrra.

Fataverslun var 2,0% minni í júlí miðað við sama mánuð í fyrra á föstu verðlagi og jókst um 4,8% á breytilegu verðlagi á sama tímabili. Verð á fötum var 7,0% hærra í júlí síðastliðnum en í sama mánuði ári fyrr. 

Velta skóverslunar jókst um 1,4% í júlí á föstu verðlagi og jókst um 14,1% á breytilegu verðlagi miðað við sama mánuð í fyrra. Verð á skóm hækkaði um 12,5% frá júlí í fyrra.

Velta húsgagnaverslana var 5,9% minni í júlí en í sama mánuði í fyrra á föstu verðlagi og var 1,7% minni á breytilegu verðlagi. Velta sérverslana með rúm minnkaði um 11,5% frá því í fyrra á föstu verðlagi. Verð á húsgögnum var 4,4% hærra í júlí síðastliðnum miðaða við sama mánuð í fyrra.

Sala á raftækjum í júlí jókst um 13,1% á föstu verðlagi frá sama mánuði í fyrra og um 15,4% á breytilegu verðlagi á sama tímabili. Verð á raftækjum hækkaði um 2,0% frá júlí 2009.

Verðlag og neysla
Verulega hefur dregið úr verðhækkunum frá síðasta ári og hefur verð lækkað í öllum vöruflokkum frá mánuðinum á undan, nema verð á húsgögnum sem hækkaði um 1,3% frá júní. Fataverslun í júlí, sem einkennast af sumarútsölum,  var 2% lakari að raunvirði en í júlí í fyrra.  Skóverslun gekk hins vegar betur og jókst um 1,4%. Raftækjaverslun virðist heldur vera að ná sér á strik eftir mikinn samdrátt að undanförnu. Þannig var raunvelta í raftækjaverslun 13,1% meiri í júlí en í fyrra.

Verslun fyrir verslunarmannahelgina fór fram í júlí líkt og í fyrra. Ef marka má þann raunsamdrátt sem varð í veltu dagvöruverslana og áfengisverslun í júlí samaborið við júlí í fyrra má ætla að landsmenn hafi ekki gert eins vel við sig í mat og drykk um síðastliðna verslunarmannahelgi og í fyrra. Fjöldi erlendra ferðamanna til landsins var 1,5% meiri en í júlí í fyrra samkvæmt mælingu Ferðamálastofu. Sú aukning virðist ekki hafa skilað sér í aukinni sölu á mat og drykk og rennir stoðum undir það mat ferðaþjónustuaðila að erlendir ferðamenn spari meira við sig nú en í fyrra.

Velta í flestum tegundum smásöluverslunar hefur það sem af er þessu ári verið heldur minni en á sama tímabili í fyrra að raunvirði. Samt sem áður hefur náðst jafnvægi í  flestum tegunda verslunar nema þeirra sem selja varanlegar neysluvörur. Ýmsar hagtölur benda til að botninum sé náð í samdrætti einkaneyslu. Dæmi um það er hækkun kaupmáttar launa í júlí í fyrsta sinn um langt skeið, eða um 0,3%.


Nánari upplýsingar veita Kári Joensen ( Ţetta netfang er variđ fyrir rusltölvupósti, ţú ţarft ađ hafa Javascript virkt til ađ skođa ţađ ) og  Emil B. Karlsson ( Ţetta netfang er variđ fyrir rusltölvupósti, ţú ţarft ađ hafa Javascript virkt til ađ skođa ţađ ), forstöðumaður Rannsóknaseturs verslunarinnar í síma 822 1203