Eins og kunnugt er samþykkti  ESA - Eftirlitsstofnun EFTA  tímabundnar undanþágur fyrir tiltekna tegund farms á tilteknum leiðum á Íslandi með úrskurði sínum í byrjun júlí. Samgönguráðuneytið setti nýja reglugerð strax í birtingu og hefur hún þegar tekið gildi.

Flutningasvið SVÞ hefur lagt mikla vinnu í að sannfæra samgönguráðuneytið um að smásmuguleg framkvæmd evrópskra aksturs- og hvíldartímareglna eigi illa við á íslenskum vegum.

Enginn efast um að þreyta er áhættuþáttur í umferðinni og flutningasvið SVÞ er þar engin undantekning en að framfylgja þessum evrópsku reglum með þeim hætti sem gert hefur verið hér á landi er að mati flutningasviðsins mun frekar til þess fallið að auka streitu atvinnubílstjóra en að hvíla þá.

Þessi nýja reglugerð segir ekkert um það hver framkvæmdin verður. Það er framkvæmdin sem skiptir öllu máli og hana hafa íslensk yfirvöld í hendi sér.

Flutningasvið SVÞ hvetur samgönguráðherra og yfirmann samgöngumála að sjá til þess að eftirlit, sektir og refsingar vegna brota á þessum reglum taki mið af almennri skynsemi og sjái til þess að gera þetta umhverfi verði manneskjulegt og taki fullt mið af íslenskum aðstæðum. 

• Reglugerð 605/2010
• Reglugerð ESB nr. 561/2006
• Þýðing utanríkisráðuneytisins á reglugerð ESB 561/2006
• Sjá nánar ferli málsins frá hausti 2006 á þessari vefslóð