|
Neytendaráðherra Dana, Carina Christensen, hefur
lagt til við stærstu marvöruverslanakeðjurnar að þær sameinist um að
staðsetja alla óhollustu á lítt áberandi stöðum í verslunum sínum og í
staðinn láta grænmeti og ávexti fá bestu staðsetningarnar. Hún vill
líka sjá vörur eins og jógúrt með miklu sykurinnihaldi og feita matvöru
á minna áberandi stöðum en nú tíðkast.
Offituvandamál
meðal barna og fullorðinna er vaxandi vandamál í Danmörku eins og
víðast hvar annars staðar í hinum vestræna heimi og ekki verði lengur
litið fram hjá því án aðgerða. Carina telur marga Dani lifa
óheilsusamlegu líferni og stór hluti af vandamálinu séu matarinnkaupin.
Með því að fara út í aðgerðir eins og þessar megi m.a. koma í veg fyrir
martröðina við búðarkassana þegar börnin heimta það sem fyrir augu ber
í hvert sinn sem borgað er. Tillögur Carina hafa fengið góðan
hljómgrunn meðal stjórnmálamanna sem eru sammála um að smásöluverslunin
eigi að sýna samfélagslega ábyrgð og taka þátt í því að almenningur
velji hollar og heilsusamlegar vörur fram yfir óhollustu. Forsvarsmenn
smásöluverslana hafa tekið misvel í tillögurnar og t.d. hefur Dansk
Supermarked, sem stendur á bak við Netto,Bilka og Føtex, ekki viljað
tjá sig um málið.
|
