Aðalfundur Samtaka sjálfstæðra skóla  fór fram fimmtudaginn 29. apríl í Húsi atvinnulífsins.

Þorbjörg Helga Vigfúsdóttir, gestur 5. aðalfundar SSSK
Gestur fundarins var Þorbjörg Helga Vigfúsdóttir, formaður leikskólaráðs Reykjavíkur. Hún flutti erindi sem var í senn upplýsandi um samskipti leikskólaráðs og fulltrúa SSSK en einnig skemmtilegar vangaveltur um lífið og tilveruna. Hún fagnaði því að borgarráð samþykkti fyrir sitt leyti þjónustusamning við  leikskóla  SSSK þennan sama dag. Vinna við þann samning hefur staðið yfir mest allt kjörtímabilið. Hún hvatti liðsmenn í Samtökum sjálfstæðra skóla til að halda vörð um  sérstöðu sína og frelsi og undirstrikaði einnig að hún fyndi fyrir auknum skilningi á mikilvægi frjáls rekstrarforms í stjórn borgarinnar.

Skýrsla stjórnar
Margrét Pála Ólafsdóttir, formaður Samtakanna, flutti skýrslu stjórnar og undirstrikaði góða áfanga í starfinu á starfsárinu. Hér má nefna inngöngu nánast allra aðila í SSSK í Samtök verslunar og þjónustu,  tímafrekan undirbúning að þjónustusamningi milli leikskóla SSSK við Reykjavíkurborg sem er í burðarliðnum, baráttu grunnskólanna í röðum SSSK fyrir auknu framlagi með nemendum sem koma úr öðru sveitarfélagi en skólinn starfar í, en þar munar umtalsverðum fjárhæðum. Hún kom einnig inn á vel heppnaða ráðstefnu sem SSSK stóð fyrir; ,,Jákvæðni er óborganlegt veganesti“ og árshátíð SSSK í Reykjanesbæ í byrjun mars. Hún minntist einnig þeirra tímamóta að Samtökin eiga fimm ára afmæli og horfði til framtíðar og mikilvægra verkefna sem standa fyrir dyrum s.s. baráttu fyrir starfsumhverfi smábarnaskóla, kjarasamningagerð og fleira.

Kosning nýrrar stjórnar
Í aðalstjórn voru kosnar: Margrét Pála Ólafsdóttir, formaður, Sigríður Anna Guðjónsdóttir, varaformaður, Guðrún Björnsdóttir, meðstjórnandi, Lovísa Hallgrímsdóttir, ritari og Margrét Theodórsdóttir, gjaldkeri. Þetta er óbreytt stjórn frá síðasta ári. Í varastjórn voru kosin: Ída Jensdóttir, Snorri Traustason og Jón Örn Valsson í stað  Péturs Guðmundssonar sem gaf ekki kost á sér til áframhaldandi stjórnarsetu.

KK lék við hvern sinn fingur
Eftir að fundarstörfum lauk nutu fundargestir ljúfra tóna KK og gæddu sér á góðum veitingum og áttu góða samverustund.

Okkur í sjálfstæðum skólum lætur vel að hlúa að uppbyggjandi þáttum í skólunum okkar. Þess vegna var kjörið á því herrans ári 2010 að undirstrika þá staðreynd enn frekar og skoða mannlífið með jákvæðu augunum. Fyrirlesararnir á ráðstefnunni nálguðust viðfangsefnið frá ólíku sjónarhorni: Una Steinsdóttir sagði frá erfiðum aðstæðum og  hlutskipti á vinnustað, hvernig jákvæðni getur gert gæfumuninn, bæði fyrir starfsfólk og viðskiptavini. Bryndís Björk Ásgeirsdóttir nálgaðist viðfangsefnið með fræðilegu ívafi og síðan var Gunnar Hersveinn á heimspekilegu nótunum.

Auk fyrirlesara fluttu þau Árni Sigfússon og Oddný Sturludóttur ávörp og hún Margrét okkar Pála sló svo ráðstefnutóninn eins og henni einni er lagið. Ráðstefnunni lauk síðan með eftirminnilegum hætti því ráðstefnugestir slógu trumbur og önnur ásláttarhljóðfæri undir stjórn Karls Ágústar Úlfssonar. Jákvæðnin fékk enn eina birtingarmyndina í fínum samhljómi ráðstefnugesta.  Allt saman hollt, gott, fræðandi og uppbyggjandi. Ekki má gleyma öðrum tónlistarflutningi: Kór barna í leikskólanum Regnboganum sungu fallega fyrir okkur og Matthías Stefánsson gladdi einnig með fiðlutónunum sínum í upphafi ráðstefnu og ráðstefnuhléi. Andrés Magnússon sinnti ráðstefnustjórn með miklum ágætum.