Í dag 20. febrúar var undirritaður samningur á milli SVÞ - Samtaka verslunar og þjónustu og Skólavefsins ehf. um uppsetningu á  námsefni á vefformi sem tekur á vörurýrnun vegna þjófnaðar. 

Námsefnið er ætlað framlínustarfsfólki í verslun og þjónustu og tekur á öllu því sem viðkemur rýrnun vegna þjófnaðar.  Með því að setja námsefnið upp á vefformi verður notendum gert kleyft að nálgast efnið hvar og hvenær sem er og er það í takt við núverandi þróun á sviði tækni- og fræðslumála.  Þannig geta fyrirtæki í verslun og þjónustu sinnt grunnfræðslu um rýrnun vegna þjófnaðar án mikillar fyrirhafnar eða kostnaðar.  Áætlað er að námsefnið verði tilbúið til notkunar í september  nk.

Umsjón með verkefninu fyrir hönd SVÞ  hefur Lísbet Einarsdóttir, forstöðumaður flutninga- og fræðslumála.

Á myndinni, sem tekin var við undirritun samningsins eru Andrés Magnússon, framkvæmdastjóri SVÞ og Jökull Sigurðsson, framkvæmdastjóri Skólavefsins.