•  „Brýnt að ný ríkisstjórn kalli bændasamtökin, aðila vinnumarkaðarins og stjórnvöld til samstarfs um úrbætur í landbúnaðarkerfinu,“
  segir Björgólfur Jóhannesson, formaður SA
• Augljósasta og áhrifaríkasta leiðin til að efla kaupmátt almennings er að hagræða í landbúnaði og draga úr  samkeppnisvernd
• SVÞ skora á hagsmunaaðila í landbúnaði að koma með opnum huga til viðræðna og samstarfs um aukna framleiðni í greininni

SVÞ - Samtök verslunar og þjónustu hafa á síðustu vikum vakið athygli almennings og stjórnmálamanna á því að ef dregið væri úr innflutningshöftum og viðskiptafrelsi aukið mætti lækka matarútgjöld hvers íslensks heimilis um tugi þúsunda. Ef matarreikningur meðalheimilisins lækkaði um 10%  hefðu landsmenn um 16 milljarða króna til viðbótar til ráðstöfunar til að greiða niður skuldir eða kaupa vöru og þjónustu að eigin vali. Miðað við hagspár og stöðuna í hagkerfinu eins og hún blasir við, þá er þetta raunhæfasta leiðin til að auka kaupmátt almennings.

Málflutningur SVÞ hefur fengið góðar undirtektir hjá almenningi og fjölmörgum stjórnmálamönnum. Í gær tók Björgólfur Jóhannesson, formaður Samtaka atvinnulífsins, undir málflutning SVÞ í ræðu sem hann hélt á fundi á vegum Samtaka mjólkur- og kjötvinnslufyrirtækja.  Björgólfur sagði m.a.:

„Það er mikilvægt að víðtæk samstaða náist um trúverðuga áætlun sem hefur að markmiði að auka framleiðni og verðmætasköpun í hagkerfinu. Þetta verður að leiða til þess að hagvöxtur á Íslandi verði meiri en í samkeppnisríkjunum og hann verður að ná til allra atvinnugreina og þar er landbúnaðurinn ekki undanskilinn.“